*ವೃದ್ಧೆ ಶಾರದಮ್ಮರನ್ನು ಕೊಂದು ಚಿನ್ನ ದೋಚಿದ್ದ ಕಿರಣ್ ಗೆ ಜೀವಾವಧಿ ಜೈಲು ಶಿಕ್ಷೆ* ತೀರ್ಥಹಳ್ಳಿಯ ಹತ್ಯೆ ಪ್ರಕರಣ

*ವೃದ್ಧೆ ಶಾರದಮ್ಮರನ್ನು ಕೊಂದು ಚಿನ್ನ ದೋಚಿದ್ದ ಕಿರಣ್ ಗೆ ಜೀವಾವಧಿ ಜೈಲು ಶಿಕ್ಷೆ*

ತೀರ್ಥಹಳ್ಳಿಯ ಹತ್ಯೆ ಪ್ರಕರಣ

ವೃದ್ಧೆಯನ್ನು ಕೊಂದು ಆಕೆಯ ಬಂಗಾರದ ಕಿವಿ ಓಲೆಯನ್ನು ಕದ್ದೊಯ್ದಿದ್ದ ತೀರ್ಥಹಳ್ಳಿ ತಾಲ್ಲೂಕಿನ ಲಿಂಗಾಪುರ ಗ್ರಾಮದ ವ್ಯಕ್ತಿಗೆ ಶಿವಮೊಗ್ಗದ ಘನ ಮೂರನೇ ಹೆಚ್ಚುವರಿ ಮತ್ತು ಜಿಲ್ಲಾ ನ್ಯಾಯಾಲಯ ಜೀವಾವಧಿ ಕಾರವಾಸ ಶಿಕ್ಷೆ ಮತ್ತು 20 ಸಾವಿರ ರೂ.,ಗಳ ದಂಡ ವಿಧಿಸಿ ಆದೇಶ ನೀಡಿದೆ.

ನ್ಯಾಯಾಧೀಶರಾದ ಯಶವಂತ ಕುಮಾರ್ ರವರು ಈ ಆದೇಶ ಹೊರಡಿಸಿದ್ದು, ಶಿಕ್ಷೆಗೊಳಗಾದ ಆರೋಪಿ 27 ವರ್ಷದ ಕಿರಣ್ ಆಗಿದ್ದಾನೆ.

ಕಿರಣ್, 2021ರ ಜನವರಿ 21 ರಂದು ಮೂವಳ್ಳಿ ಗ್ರಾಮದ ವಾಸಿ ಶಾರದಮ್ಮ(68)ರನ್ನು ಹಣ ಕೇಳಿದಾಗ ಕೊಡದಿದ್ದುದಕ್ಕೆ ಕಬ್ಬಿಣದ ಕೊಳವೆ ಮತ್ತು ಕುಡುಗೋಲಿನಿಂದ ಕೊಲೆ ಮಾಡಿದ್ದ. ಆ ನಂತರ ಆಕೆಯ ಮೈಮೇಲಿದ್ದ ಚಿನ್ನ ದೋಚಿದ್ದ.

ಈ ಬಗ್ಗೆ ಮಾಳೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಪ್ರಕರಣದ ಆಗಿನ ತನಿಖಾಧಿಕಾರಿ ಸಿಪಿಐ ಪ್ರವೀಣ್ ನೀಲಮ್ಮನವರ್ ಆರೋಪಿತನ ವಿರುದ್ಧ ಚಾರ್ಜ್ ಶೀಟ್ ಸಲ್ಲಿಸಿದ್ದರು.

ಸರ್ಕಾರದ ಪರವಾಗಿ ಸರ್ಕಾರಿ ಅಭಿಯೋಜಕ ಜೆ.ಶಾಂತರಾಜ್ ವಾದ ಮಂಡಿಸಿದರು.